一日三餐

之前聽好多朋友嚟一日三餐都要大排長龍，趁平日放假，朝早10點幾去碰碰運氣。好彩去到啱啱有位走嘅時候已經開始有人龍！

第一次嚟，叫咗我平時茶記食開嘅沙嗲牛肉米粉，加個3.6牛乳炒滑蛋、牛油厚方包、仲有OpenRice見到似乎好吸引嘅賞花杏仁露，平凡中各有驚喜

沙嗲牛肉係佢招牌菜之一，個沙嗲汁果然煮得好香，牛肉嫩滑。

招牌沙嗲牛肉米粉

方包用嘅係丹麥麵包，就算唔搽牛油，本身已經充滿牛油嘅香甜，正方形厚切保留咗四邊麵包皮嘅香味同咬口，細細塊唔會食得太膩。

杏仁控嘅我一般對茶記嘅杏仁茶冇乜期望，但係呢杯賞花杏仁露真係唔錯，有杏仁嘅香味，唔會死甜，加埋鋪上面嘅食用花瓣，有誠意嘅美味之作

賞花杏仁露