一般日本餐廳未必有咁多唔同種類卷物。
古今二主打唔同種類卷物，選擇多達45種！
所有卷物皆為即點即做！淨係睇餐牌都睇到花多眼亂！
食物名好特別，十分有創意！
價錢中等，食物質素唔錯，賣相唔差！
＊－。－。－。－。－。－。－。－。－。－＊
🔸彩虹卷$98
卷物上層鋪滿三文魚、吞拿魚、牛油果，
顏色鮮艷似彩虹咁，中層捲着青瓜，非常爽口。
🔸煙花 $95
卷物上層係辣味吞拿魚，加上脆片好香口。
中間係辣味三文魚，微辣唔會蓋過魚的鮮味。
🔸綠野仙蹤 $98
滿滿的水蜜桃粒同飛魚子鋪滿卷物上層，
中層包裹着牛油果、八爪魚、蘋果粒同蟹柳，
除咗食到有果香味，口感亦非常豐富。
🔸龍捲風沙律 $68
沙律新鮮，份量多。
蟹柳絲同飛魚子堆砌成一座小山丘。
中下層係中華沙律，帶微辣，開胃一流。
🔸黑豚荔枝卷串燒 $38
將荔枝肉卷在黑豚肉入面燒，配搭新穎，不會太乾。
荔枝味道清甜，肉質帶爽脆，與黑豚肉味道好夾。
串燒上加了少量芝麻，香氣洋溢。
🔸日式炒烏冬 $78
如果食完卷物都未夠飽，可以叫一份炒烏冬填飽個胃。
烏冬彈度適中，加入三色椒、雜菇、木魚碎，
熱辣辣炒起好夠鑊氣！
＊－。－。－。－。－。－。－。－。－。－＊
