玉子造屋 (已結業)

實在係太鍾意食蛋，所以一知道有呢間專食玉子嘅餐廳，一直都想試好耐！就算係將軍澳離我屋企好遠，都終於決定嚟試下！一見到呢頁Menu真係好興奮，同時亦都好煩惱唔知揀邊樣好，最後決定一次過要個雙拼，菠菜奶油三文魚扒配味增南瓜汁炸蝦蛋包飯。我哋升級要咗套餐，前菜會有三款日式涼拌小食同埋一個麵豉湯，跟餐仲有飲品。講返個主菜，果然無揀錯，兩邊都好好食！三文魚扒有適當嘅油份，食落好香。而炸蝦亦都炸得好好，唔會成口粉。重點就梗係啲蛋啦，雖然佢個樣睇落唔係嗰種好滑嫩既蛋，但食落就的確非常之滑！加上我哋升級左做黑松露旋風蛋，加埋陣陣黑松露香真係好好食。呢度除咗蛋包飯系列之外，仲有其他冇蛋嘅丼飯，意粉同埋拉麵選擇。朋友就揀咗呢個牛扒鵝肝丼，聽落咁矜貴，同埋用料十足都只係百幾蚊，非常抵食。牛扒肉味好濃而且唔會靭，鵝肝亦都好大嚿，煎得好香。而且呢碗飯都有一隻糖心蛋，成件事好正。最後仲要左份近年甜品界大熱嘅疏乎厘pancake，我哋要咗香蕉熔岩醬。呢個甜品真係非常之有驚喜！除咗本身個疏乎厘pancake好鬆軟之外，蛋味亦好濃。上面嘅香蕉用焦糖煎左，加埋個熔岩醬唔會太甜太漏，十分出色。果然不惜我咁遠水路嚟試一試！