龍門冰室 (已結業)

而家啲懷舊冰室、茶餐廳成行成市，價錢貴到嚇死，想食下地道茶記都唔係咁易。前日終於的起心肝去幫襯呢排最高討論度嘅龍門，可能我6:30pm去，唔洗等位，仲可以揀卡位坐！坐低發現每張枱備有口罩暫存袋👍🏻望下餐牌，價錢唔貴，叫咗2個鐵板餐。跟餐叫個龍鳳檸樂只係$7，勁抵！等咗陣至尊海鮮同星級雜扒就上枱，份量大得驚人！海鮮起碼有3塊龍脷柳！我嗰份雜扒有半個碟咁大份嘅雞扒同牛扒，大份至要拎個碟擺開佢先食到！拎開塊扒，墊底嘅薯條多到食唔晒，勁開心食咗一半已相當飽，性價比超高，味道又無得彈，加上係屬於香港人嘅茶記，要將佢收歸入我嘅飯堂list!香港人，加油！