好耐無用過訂枱平台App訂座食飯，最近又突然對印度菜好有興趣，加上星期日行遠少少去開堅尼地城嗰頭，喺各樣因素嘅驅使下，我就Book咗呢間「KTM Bar and Kitchen」試下。中午12:30有半價優惠👍，早啲起身都值🙈，折扣後每人大約$85左右。
我哋準時去到，餐廳無乜員工，等咗陣都無人招呼我哋，所以自己坐低😅。第一個感覺係好熱，第二個感覺都係好熱，大約坐咗半個鐘先好啲，第三係因為大玻璃窗嘅關係，所以比較曬☀️。
餐廳裡裡外外環境都幾色彩繽紛，富有民族風味。不過夜晚可能係酒吧嘅關係，加上又有得食水煙，冷氣唔夠，浸Shisha味揮之不去...，有啲趕客。
餐廳主打印度菜同尼泊爾菜，餐牌大大張，翻譯哂做中文同英文，清晰易睇👍。平日應該有做午市套餐，週末就好似無。
印式薯仔沙律Aloo Chat($42)，依個係辣味嘅蕃茄薯仔🥔，薯仔偏淋身，味道幾重香料味，都辣辣哋，仲要有好多我唔鐘意嘅蔥同青豆。整體無乜特別，一般般。
青瓜乳酪Raita($52)，由於我係🥒青瓜控，所以一喺Menu上見到就嗌咗...。出到嚟同我想像中唔同，應該係我少食印度菜唔識啫。啲乳酪酸到盲都識開眼呢，醒胃嘅，但對我嚟講幾啖已經乜都夠哂。至於青瓜，就係好碎好細粒，味道唔出。
接下來就係食印度餐必備嘅咖哩同薄餅喇🇮🇳 👳🏿♂️。
原汁咖哩雞Chicken Curry($98)，印度咖哩普遍都不會太辣(好似有得揀辣度，但佢無問我...)，依個亦然，有少許椰香。🥘咖哩雞份量都足，雞肉大約有四件，肉質幾嫩，唔好睇個兜細細，啲汁夠哂點有餘。
甜烤餅Kashmiri Naan($35)，其實Naan🥙有好多種，我都唔係好識分，係上網見人哋話甜薄餅幾正，先試下。估唔到出到嚟都唔錯喎，薄餅中間夾咗好多橙色一粒粒，估計係椰絲嚟，甜甜的，都幾特別，可以一試🤤。
其實食完上述幾樣菜式都飽飽地，但一早嗌咗餃子又想試埋佢。點知餐廳漏咗單...，好彩唔使再等好耐就有得食。🥟尼泊爾小籠包Momos($48/5隻)，餡料可揀豬、雞或者蔬菜，我哋要咗豬肉Pork🐷。烹調方法可揀湯底(Soup-base (Jhol))、蒸或炸，我認為如果唔食炸嘅，可以試湯，因為係蒸完放落湯到。個湯有啲花生醬味，不過唔太夠熱，但餃子本身絕對有驚喜，因為係皮滑同爆餡的，鹹咗少少，但仍然係好食的😋。餃子大大隻，造型真係好似小籠包，所以依個中文菜名改得非常貼切！
總括嚟講，呢餐印度午餐都OK嘅，但食物味道唔算太突出，同行中應該有唔少比佢優秀。不過MOMOS小籠包就真心唔錯，係尼泊爾菜式，唔知係咪咁多地方有得食呢？如果嚟開依間餐廳，就不妨試試吧！店員其實都幾友善嘅，但始終感覺服務唔夠細心，有改善嘅空間🙏🏻。
