MONMONO (已結業)

話說又係放假日子，興起諗到一直bookmark呢間餐廳已久，即管打電話去問下仲有冇得book，好彩都有個門口位比我地！外觀一睇已經係相當特別嘅藍調，入到室內，基本上係一片星空藍，復古卡座、壁畫、加上招牌嘅古董老爺車及CASINO，環境上已經係賞心悅目！同友人分別嗌咗兩道starter同一道main course分享，份量恰當，價錢嚟講其實不便宜。首先係「天婦羅三重奏」，當中包括蠔肉醬紫蘇葉、蟹肉春卷及蘑菇蝦肉，香脆熱辣辣，比想像中可口，尤其是蠔肉醬紫蘇葉，可以再試！然後就係「慢煮雞胸沙律」，味道就不過不失，配上柑橘芝麻汁十分開胃。最後就係「蟹肉紫菜寬麵配海膽味噲湯醬」，每一條寬麵都掛上濃厚嘅海膽醬，十分惹味，不過略為蓋過咗蟹肉嘅味道。總括而言，特色藍調餐廳打卡一流，性價比就見仁見智，但味道算是不錯，不過建議大家都係預先book位先可以坐到d靚靚打卡復古卡座。