推介幾款我覺得好深刻嘅嘢食：
‣ 波士頓龍蝦
有龍蝦真係冇得輸，好多時食酒店自助餐都係為咗個龍蝦。餐廳配埋泰式辣汁，但係我個人覺得就咁食已經好好食，反而配埋辣汁我覺得味道太搶。啲膏真係多到爆炸，我睇住細佬已經食咗四隻，真係爽食。
‣ 魚子醬
嗌魚子醬就係為咗自行做組合，嗌刺身、壽司我都會放幾匙魚子醬喺上面，簡直係豪華combo，魚子醬我都嗌咗三盒，真係好好食，一啲都唔腥。
‣ 金槍魚腩
我細佬超鍾意食金槍魚腩，嗰啲油花真係一絕，佢自己都嗌咗三輪金槍魚腩。好似我比較怕肥我就會食多啲海膽，但如果鍾意食金槍魚嗰啲，唔嗌真係會後悔。
‣ 海膽軍艦
海膽唔腥，見其他人都話餐廳係用日本海膽，食落去我都覺得似。雖然佢冇搭配其他嘅海鮮，但係我覺得咁樣反而食得出海膽嘅純粹鮮味。偷偷地講我會加埋魚子醬一齊食，試過你就知入口個感覺會有幾豪華。
‣ 海膽拖羅鱈魚乾手卷
‼️超級推薦‼️認真講我平時去食放題，我真係極少食壽司，就算食嘅話可能都係試一件就算，但係佢係好食到我忍唔住叫咗三件。我自己好鍾意佢加咗鱈魚脆脆喺底，所以咬落去個口感會有唔同，而且本身個紫菜都好脆，仲有啲爆汁嘅三文魚子，絕對值得一試。
‣ 避風塘炒蟹
老實講，餐廳嘅海鮮真係都好新鮮，一樣都係肉質好鮮嫩，唔會梅晒。而且佢個避風塘都真係幾辣下，我覺得食吓過吓口癮都幾唔錯嘅一個選擇。
‣ 蒜蓉粉絲蒸蟶子王
蟶子係有少少喜出望外，冇諗過咬落去都係咁新鮮，果然係蟶子王。我覺得餐廳都處理得好好，唔會有沙嘅感覺，可以係咁食都唔會覺得膩。
‣ 油鹽焗大頭蝦
其實你一咬就知道係咪真係新鮮，大頭蝦嘅肉唔會痴住啲殼，咬落去好彈牙，一啲都唔柴，相當之值得一試。想食刺身叫海赤蝦又得，想食熟食嘅話就一定叫大頭蝦，絕對唔會推薦錯。
‣ 殿堂級香煎鵝肝多士
呢間放題真係咩都俾你食勻晒，唔止鮑魚、龍蝦同埋魚子醬，鵝肝都有。佢係鵝肝真係煎得勁香，又嫩。唔使搭配多士就咁食我都覺得個口好滿足。
‣ 海燕窩椰汁燉木瓜
不得不讚賞餐廳嘅木瓜真係冇得彈，一上枱嘅時候熱辣辣，搭配椰汁燕窩一齊食，將啲木瓜肉攪拌入去，相當之香。而且木瓜燉得好腍，啱晒我呢啲最鍾意食軟腍腍果肉嘅人，就好似食咁升級版嘅木瓜鮮奶，每枱都至少嗌一個，所以點都推薦大家叫一個試吓。
‣ 燒榴槤
我細佬就好鍾意食榴槤，我就還好，試咗啖我覺得佢啲燒榴槤都幾正。細佬就話好甜好好食，燒一燒令到佢個香味更加突出，平時唔算好鍾意食，我都覺得係好甜。如果鍾意食榴槤真係可以係咁叫，淨係食榴槤放題都抵晒。
