香港嘆得起冰室 (已結業)

呢日放工去探個朋友，佢住長沙灣，所以就順便喺附近買嘢食。之前我個午餐飯腳話嗰頭有間唔錯嘅茶記叫「香港嘆得起冰室」，我哋就一於去炒兩個小菜做晚飯啦🥢。茶餐廳嚟講，佢環境可算係一流，冷氣充足，裝修又靚，主色仲要係港女至愛嘅Tiffany Blue湖藍色💙。另外，餐廳更不乏潮語：俾啲掙扎💪🤣。我哋叫咗兩個小菜，其實特價餐平啲，不過唔夠小菜吸引嘛🙈。再者，店員都話小菜嘅餸量會多啲，果然無呃我！金沙蝦球($78)，呢個🍤蝦球真係好食到不得了。首先，蝦球大隻新鮮，口感彈牙無比，而且仲有成十隻添，就算外賣都絕不欺場！堂食外皮應該更脆。第二就係金沙鹹蛋黃味超正，食落好似西瓜咁沙沙地，味道拿捏得好好，夠鹹、又夠甜，一個字：正😋。就連墊底嘅炸粉絲都索哂味！蜜椒一口牛($78)，呢個又係好味道，醬汁應該係黑椒汁溝蜜糖，所以好惹味，拌飯一流🤤。牛粒🐮係主角，唔算太細粒，所以食落有咬口，而且牛味都OK。但今次主角比配角搶咗風頭，因為作為伴菜嘅🥔煎薯粒更為出色，啱哂薯仔腔嘅我。轉餐(白飯+例湯)($12)，白飯就細份咗啲喇🍚，有機會一定要嗌多飯。飯就煮得正正常常，唔會過淋或過硬。例湯係青紅蘿蔔煲豬骨湯，無咩特別。