時計珈琲工房 (已結業)

喺MegaBox溜完冰之後口痕想食個下午茶，見到呢間Cafe嘅蛋糕賣相非常吸引就坐低咗。自選二款 $68呢個套餐可以喺價值$38以內嘅雪糕、蛋糕、同飲品之中揀兩款。我哋就揀咗富士山芝士蛋糕同伯爵茶拿鐵配白玉。富士山芝士蛋糕賣相好可愛，係免焗芝士蛋糕嚟，芝士味香濃，口感輕盈，如果餅底比例再多少少就perfect。嘢飲相比之下較為遜色，冇伯爵茶味，似港式奶茶多啲，唔記得嗌少甜，甜度極高。白玉正正常常，口感煙韌有糯米味。餐廳以富士山為主題，成間舖嘅裝修都係少女感滿滿嘅天藍色，而且每一件蛋糕嘅賣相都好精緻。不過餐廳係半開放舖位，環境比較嘈，同埋採用半自助形式，執枱清潔嘅頻率低少少。如果想嚟打卡都值得一試。