阿牛火鍋海鮮大排檔 (已結業)

想同姊妹慢慢食，慢慢傾，所以搵左間係太子既打邊爐，地點方便，又唔洗趕住食，開到一點半架。估唔到平日都咁熱鬧，好彩有得訂枱，雖然叫大排檔，但就好似酒家咁，係室內有冷氣，環境舒適，一d都唔迫架。食材選擇都好多，價錢非常大眾化呀，精選盛肉好抵食，一定要叫呀。今次叫左鴛鴦鍋，沙嗲湯底夠晒濃郁惹味。食物份量十足，款款都大大碟架，其實雞子都好大粒，只係放係巨型響鈴隔離，所以顯得比較細小。雞子好鮮唔蘇，響鈴質素都好好，食到最後都保持到脆卜卜。肥美鵝腸真係好肥味，爽口既鵝腸帶底住少少既肥膏，好好味呀。最重要係洗得好乾淨，咁大碟我都食得晒呀。鯪魚豆卜，豆卜用鯪魚肉釀到脹卜卜咁，魚肉鮮甜冇碎骨，煮好都冇分開架，豆卜索左清湯又甜又鮮，用沙嗲湯底煮就又香又辣好惹味。鮮冬菇好新鮮，大大隻肥嘟嘟架。最愛鮮魚頭，脆鯇魚腩，魚只要夠新鮮就一定好食，所以各位可以放心叫，魚頭仲要大大個架。食到最後得返我地，店員都冇黑面或者表演得趕收工咁，值得一讚。