自從喺首爾返黎香港後，我就好似比人開咗個韓國MODE咁，約親食飯都係㨂韓國嘢食。我真係唔抗拒，因為只要係好味既，就食多啲都無問題。
我哋三個女仔都好肚餓，一口氣叫咗個牛鮮生宵夜餐四人餐。呢個牛鮮生宵夜餐入面都好豐富吓，有安格斯肉眼扒、和牛脷、大虎蝦、帶子、牛柳粒、多春魚、南瓜拼翠玉瓜菜籃，跟餐仲有韓啤4枝，食燒肉一邊又可以啤啤佢真係好爽，不過我哋都㨂返飲汽水算。
一開爐就會有STAFF幫手喺爐邊加泡菜同落蛋漿，一邊燒肉一邊睇住個蛋慢慢變熟。
安格斯肉眼扒
份量十足的肉眼扒，肥瘦適中，肉眼扒上菜時面頭已附上香草跟海鹽，若你不是重口味人士，就唔需要點其他醬汁，就咁食最好，可以食到個扒本身既肉香，宜家睇住張相都流晒口水。
和牛脷 切到細細塊既和牛脷，好處就係好容易燒熟，係咁二燒幾吓就食得，爽呀。
大虎蝦 差不多同隻碟一樣長既虎蝦開邊，好鮮甜。
帶子珍寶SIZE既帶子，煎完之後外表燒至金黃色，又一樣唔洗點醬汁都勁好味既。
牛柳粒粒粒都好大，燒既時侯要留意，第一次燒時不識，個心未燒熟就拎黎食。
多春魚考驗你燒野既功架，難道系數最高。
南瓜拼翠玉瓜 菜籃翠玉瓜燒起黎估唔到咁好味，外皮香脆，內裡仲好多汁咁。相對黎講南瓜好乾身，普普通通。
總括黎講，呢度係一間我會再幫襯既韓燒店，我已經掛住佢個安格斯肉眼扒。
