小伊甸 (已結業)

雖然今次嚟食嘅時候，要等位，但都算快等到。在場有啲客人好嘈，不時尖叫同笑，但我地離開嘅時候，一位職員過嚟同我地講「唔好意思，今日好多人同埋好嘈」，服務態度幾好，起碼佢會顧下其他食客嘅感受。其實都明嘅，佢地成班人聚會，玩到興起，嘈係好正常。嘢食方面，上次試咗佢地嘅牛肉麵，唔錯唔錯，蘿蔔好入味，啲牛又好食。今次就試下蕃茄麵，雖然等咗陣，但上嚟嘅賣相唔錯。而味道又意外地好食，佢隻醬同其他餐廳嘅唔同，認真唔錯，不過食多幾啖就開始有啲飽。今次仲飲咗杯桂花烏龍蘆薈粒，味道好清新，啖啖蘆薈粒，仲有桂花茶味好濃，真材實料。同行嘅朋友點咗芋頭牛奶（唔記得個全名），都係好好飲，芋頭同奶味都好重。