波士冰室 (已結業)

同朋友想食茶餐廳， 見到呢間冰室用懷舊香港做主題好似幾得意，所以就入去試下... 牆上面嘅晚餐menu唔太吸引...都係啲蒸魚同住家小菜，反而有興趣佢menu上邊嘅10款推介食物... 點咗瑞士雞翼、芝士腸仔肉醬意粉、芝士流心西多士、咖哩牛腩撈伊麵同雪糕紅豆冰！我覺得芝士流心西多士係一定要食！雖然聽個名已經好邪惡，不過西多士煮得又香又滋味，裏邊嘅芝士有拉絲效果，配埋牛油同埋糖漿真係不得了！另外咖哩牛腩撈伊麵都係比較少食到嘅味，佢嘅牛腩煮得好腍，唔鞋口，而且有牛筋，好彈牙炆得好入味，我最鍾意佢嘅咖哩偏向街邊魚蛋鋪嘅咖哩味，好有香港情懷！至於瑞士雞翼個人就覺得偏鹹，要配飯食比較好，不過佢嘅瑞士汁煮得好入味好香！ 肉醬意粉就有好多芝士同腸仔，好足料，食完係超級飽！雪糕紅豆冰點咗雲呢拿雪糕，紅豆份量多，溝埋牛奶，好香濃，兩種味好夾！另外要讚下收銀嗰個阿姐，因為一入嚟佢已經好好服務態度，又主動走過嚟幫手加水，反而另外兩個年輕嘅店員都冇佢咁細心... 好欣賞呢位阿姐敬業樂業的態度，多謝你，下次會再嚟幫襯！