怡翠軒 (已結業)

星期五同同事食lunch，難得佢o地肯試新野，唔駛去飲茶食來來去去都係個幾間。5個人叫了個四人特價套餐+$115任揀四款點心+一客蘿蔔絲酥餅。套餐先o黎個老火湯，然後兩蒸兩炸點心，蒸係韭菜餃同素粉果，兩款餃都饀多皮唔厚；炸係春卷及咸水角沒有特別，都夠熱唔會好勁油係底。小菜兩款係上湯浸菠菜同海蜇頭素鵝，素鵝又炸得唔多油，但外層腐皮夠脆又夠熱，海蜇頭最好食，外型好似泡泡，好有口感好爽，咬落去有種pop一聲的感覺。套餐最後係雪菜肉絲“月文”米，料好多不過D米粉炒好碎。任揀點心有叉燒包、燒買、帶子餃同蒜蓉魷魚，叉燒包個皮好鬆軟，叉燒唔算肥，我一口氣食了兩個；燒買隻蝦唔算好大隻，但夠彈牙，又唔會好多肥豬肉；雖然帶子餃同魷魚我都冇食，不過佢o地都話唔錯。最後亦最好食的蘿蔔絲酥餅，個酥皮好鬆化，而內又好多蘿蔔絲，所以好夠蘿蔔味，食過有d蘿蔔絲酥餅係唔夠蘿蔔味的。無論食物同環境都好過樓下同一集團的潮江春。