茶豆冰室

营业中

休息中

好耐未食過咁平嘅下午茶尋日出咗去深水埗幫媽咪買收音機，因為媽咪要懷舊嗰款收音機，所以我特登出咗去深水埗幫佢睇吓有冇。期間去咗一間叫做茶豆冰室嘅餐廳食嘢，叫咗下午茶餐真係覺得好平，可能平時返工嘅地方唔係尖沙咀就係旺角銅鑼灣，嗰度啲價錢都唔會話好平，好少會出到嚟深水埗，所以一坐低見到個餐牌就覺得好抵食。我個下午茶餐係吉列魚柳沙律，$34，仲有冇+1服務費。塊魚柳都幾大塊，仲大塊過我個手掌。炸到外面脆卜卜。沙律仲有好大碟，主要都係啲薯仔椰果平時食到嘅材料。另外加咗$8叫熱蛋白杏霜。至於佢就叫咗個常餐A，係吉列豬扒配仿鮑魚絲，同埋沙嗲牛肉，呢個係即食麵嚟嘅，$47，有跟埋牛油多士。另外加咗$8叫紅豆冰。吉列豬扒都幾大塊，仲有兩塊多士。沙嗲牛肉同仿鮑絲都好正常，味道夾 。至於杯紅豆冰就絲豆好多，有半杯都係紅豆，如果冰再多啲，冰涼啲會再正啲，哈哈。最後因為口渴，所以我地再叫多杯熱杏仁霜飲下，嘿 。所以人均消費$79左右 。