一休(居食屋)日本料理 (38廣場)

营业中

休息中

放工同同事搵飯食，熱辣辣好想食日本野，又到糧尾，夜晚要係旺角搵唔迫又坐得舒服的平價日本餐廳真係幾難，上星期終於搵到呢間~呢間日本餐廳係樓上，都幾大，好多卡位，我同同事係晚飯時間都唔使點等位，就有窗邊卡位坐，寬敞好坐，無限制用餐時間，可同同事吹水 勁鍾意食軟骨的我叫左個軟骨餃子棒，32蚊都幾平，怎料餃子好有水準！食落啖啖都有軟骨粒，好有嚼頭，薄餃子皮炸到脆口，我差啲自己食哂成碟 我地散叫左啲壽司，都幾多款式。壽司算抵食，無失水準。值得讚的係海膽壽司，42蚊兩件，海膽夠凍，無怪味，密舖成件壽司，食落好滿足，唯紫菜不夠脆。磯煮的帆立貝好大件，醬汁惹味，28蚊兩件，抵食！芒果乳酪松葉蟹卷都落足料，天時熱好岩食，微酸芒果乳酪幾醒胃。不得不提鰻魚炒飯超大碟！我同同事兩個一齊食都食唔哂，幾多鰻魚粒，炒飯醬汁香濃。總括來講，呢間日本餐廳用餐環境良好，服務不俗，座位舒適。食物抵食，質素不俗。