御坊餐廳 (已結業)

今晚去油麻地，本來想去一間出名店鋪食煲仔飯，但舖頭仲未開市，所以周圍行揾嘢食，路過御坊餐廳，外面睇都唔錯，所以入去試試，好好彩有卡位坐，比起其他茶餐廳坐得舒服好多，仲比較乾淨！店員同老闆都好友善，上菜好快！我哋兩個人叫咗兩個套餐同埋一個餸，套餐有粉葛鯪魚湯，唔會好咸味道適中！叫咗油鹽水浸大蜆，好大隻好好味，隻隻都好新鮮！帶子炒豆苗，菜可以自選，帶子唔大粒，但有鮮味，豆苗又新鮮，廚師炒得好有鑊氣，連啲草菇都無噏味，非常好食！凍檸茶啲檸檬都好新鮮，茶味唔澀好正😍！我哋另外叫咗燒味雙拼，揀咗貴妃雞同埋燒鴨，貴妃雞多肉但就冇乜味，要點薑蓉先好食，但啲燒鴨就喜出望外，非常之正，好有口感，一啲都唔韌，仲好多肉添😋！茶餐廳嚟講呢間真係好正，食物質素好好，埋單$270幾，確係一個好選擇！