東江食家

营业中

休息中

今日好熱，諗住簡簡單單食完餐晚飯就算。於是去左東江食家買外賣返屋企。呢間食店由細食到大，食物的質素一向好穩定。叫左2個飯盒，原來飯盒會再送多個細湯，我地三個人食，就再要多個大湯。今日係花生雞腳湯，佢地的湯的款式不多，你來食5次，可能都會有3次係呢個湯。大湯 ($13) 有2隻雞腳，細湯就有1隻。今日啲花生好多，而無論是花生定微豆都煲得好淋，好好飲。雞腳就幾乎皮骨分離，所以亦好易咬，今晚最滿意呢個湯。跟住介紹是梅菜扣肉飯。今日的飯底好好食，好乾身，而梅菜的味就甜甜地，好好送飯。扣肉就瘦肉多過肥豬肉，無論是瘦肉定肥豬肉部份都好入味，但又唔會過鹹，值得推薦。跟住係豆腐魚腩飯，飯量好多，我地最後食唔哂啲飯。個芡汁唔會太結太鹹，但豆腐比魚腩好食，魚腩個皮太厚，魚又太實，呢隻魚腩唔係咁好食。最後呢餐是$119，有2個飯+3個湯，cp值算唔錯。呢間係大埔的老字號，由細食到大，質素都能夠KEEP到，真係算唔錯。