東大街嘅嘢食係有特色，不過街坊想醫肚就貴咗啲喇...而天悅電車路嘅餐廳就變晒做大集團，去邊都係佢哋...小豬豬麵包店‧新開特色面包
開業一個月左右~行中高檔路線。包價大概$10-$30，但都係用料較好，有特色嘅包。而唔係好似啲集團咁，逼你貴價買個雞尾包。
睇過佢哋FB page，麵包師傅不斷研發新包，值得一讚~
今次啲包係屋企人買返嚟，所以價錢記得唔太清楚~
芒果芝士包($16)
三款包入面最鍾意呢個。
可以當甜品食~須冷藏。
有手掌咁大個。因為雪過所以個包會有少少水氣同散。
餡料係芒果芝士蓉，有芒果粒。因為芝士餡都係撈咗芒果汁，所以芝士味唔太濃，但芒果就好香~
下次可能試吓淨芝士味，或者會濃啲~
士多啤梨熱情果包(約$8-12)
包大過拳頭少少
醬係熱情果，微酸
上面有士多啤梨果肉，大大粒唔孤寒~
加埋杏仁碎texture更好~
出面好少見呢款包，值得一試~
唔會好似連鎖店啲包咁出現「中空」。
包有抹茶味，餡料足夠，紅豆蓉有紅豆粒，質感綿滑，可惜味道過甜。
嗜甜嘅人可能會鍾意，但我就希望食到多啲豆味~希望可以改良吓~
呢篇係呢間舖嘅第一份食評~希望佢會做到一段時間啦~要喺東大街開舖真係唔易，已經見過唔少舖頭紅得快，執得仲快。加油呀！
