花漾 (已結業)

下午茶時間，來到食新加坡菜式嘅花漾。裝修幾清新，而且座位都好闊落，大部份都係卡位或者梳化位。時代廣場來說，呢度下午茶餐性價比算高，我揀咗海南雞飯拼白胡椒肉骨茶。肉骨茶一上枱就聞到個湯好香胡椒味，裏面有一條排骨，幾件豬肚。海南雞份量比較多，再配上一碗油飯，呢個下午茶餐可以作為午餐或者晚餐。朋友食新加坡大蝦喇沙摻摻，都好大碗，好多餸。下午茶餐加$22就可以轉椰青，所以我哋兩個都飲椰青。椰青兩個都好清甜，質素唔錯。另外加咗個小食，咸蛋黃單骨雞翼，鹹蛋黃真係煮乜嘢都好食，超正，有六件，每件係半隻嘅雞翼。地方乾淨，光猛企理，店員亦都好有禮貌，送餐會小心送到你面前，唔會話就咁放咗喺枱就行開，值得一讚。