::: 台灣排長龍火鍋 (肥牛) ::: $78
天寒地凍, 放棄晒d台式地道d嘅肉燥飯呀嗰d野… 反而叫咗個期間限定嘅台灣排長龍火鍋! 呢個火鍋細細個賣相同各大連鎖快餐店嘅一人火鍋相類似… 配菜係一早塞晒入個鍋度, 要連埋個湯底一齊滾起先有得食! 唔知係d 啫哩蠟燭個火唔夠猛, 定係d料太多太滿, 個鍋好似滾極都唔起咁… 等咗好耐先有得食…
配菜種類都幾豐富! 有大白菜、娃娃菜、金菇、冬菇、紅蘿蔔、魚腐、貢丸、腐皮、雲吞等… 本來仲有粟米, 但因為佢無晒貨所以話比多d其他料我地wor~ 全部蔬菜都幾新鮮~ 不過個湯底比較淡, 開頭淨係得菜味道真係好清, 要靠埋d牛肉味先可以濃郁d… d配料因為要等湯滾起先熟, 所以浸湯時間太長喇… 尤其魚腐雲吞呢d太淋就唔好食… 肥牛份量都夠一人食嘅, 帶有少少雪藏味, 牛味都比較少, 不過都可以接受嘅…
火鍋仲附送一大杯凍柑桔檸檬果茶, 夠晒大杯夠晒凍! 酸味比較重而柑桔味冇乜~
::: 蜂蜜花生醬厚吐司 ::: $15
一場嚟到呢間主打台式食物嘅餐廳, 淨係打個邊爐又點得呢? 所以我地都叫番樣好台式嘅厚吐司試下! 呢個吐司賣相十分精美~ 成吋厚嘅吐司烘得頗鬆脆~ 我最欣賞嘅係佢d花生醬搽得十分均勻!! 連d蜜糖都分佈得好好! 而且兩種醬份量得宜, 花生醬嘅鹹香唔會蓋咗蜜糖嘅清甜味~ 兩種醬混埋一齊又唔會過鹹過甜, 連埋吐司食啱啱好! 如果d花生醬可以再加d花生粒就更好啦~~~
裝修有格調, 坐位夠闊落, 環境嚟講真係幾舒服! 不過店面太大, 人手不足, 今晚仲要冇乜人, 好多時都叫唔到人理我地… 同埋d staff可能未train得好, 態度呆呆滯滯咁, 好似啞咗… 如果連呢樣都可以改善到就更好喇!
1
