元朗燒賣皇后妙舒

作為一個港島人，實在好少入元朗，今次區內朋友發起團購，團購元朗嘅燒賣皇后。難得可以唔使過海就食到新界嘅美食，咁就一定要支持下。

冬菇豬肉燒賣

我買咗佢嘅冬菇豬肉燒賣同埋牛肉球。去酒樓嘅時候我哋通常都喜歡大蝦燒賣因為佢有粒蝦，但呢個燒賣雖然冇大蝦，但有豬肉同冬菇嘅香味，隔水蒸熱之後都已經好飽滿。至於牛肉球，而家好多時響外面嘅牛肉球都好多粉食唔到牛肉同芫荽嘅香味，但佢哋嘅牛肉球就絕對有老牌酒樓嘅味道。自己加埋喼汁，就只係欠那一片山竹。