金恒香海鮮酒家

有親戚黎食晚飯。未食都已經出事。十六個人可以比左張十二人枱不過又唔可以話佢，因為已經係最大個張黎.........未試過逼都咁。

算，講下嘢食。兩個字—垃圾，我落下大家樂都冇咁差。(菜名根據上菜次序而打)1.碧綠花姿象拔蚌：炒得好HEA，好油好鹹。2.沙律吉列鳳尾蝦：樣係一條日式吉列炸蝦，一條直嘅。裡面係蝦膠，並非原隻蝦。兼且我覺得呢個餸完全唔夾囉。3.乳豬拼盤：除左叉燒係熱，其他都係凍。4.翅：不過不失5.玉環瑤柱脯：呢個真係好難食。汁還汁瓜還瓜。瓜係小學飯盒個兜瓜嘅質素，有陣草青味。汁好鹹，瑤柱普通。6.濃湯花膠金錢浸翡翠：冇食唔評論太多。但齋睇樣係好唔吸引。7.脆皮燒雞：肉好老8.清蒸龍躉：肉好老，大條有鬼用咩。9.幸福伊麵：唔錯，不過好油(隔左20分鐘)10.糯米飯：從賣相有白色一撻撻，未兜好。到口感太油太濕。可以講富寶街市有一檔間中賣糯米飯(廿五蚊)仲好食過佢。完全垃圾。(隔左30秒)11.紅棗糕：另一個垃圾。可以加大量薑汁去蓋過哂紅棗嘅味，好波!12.黃金千層糕：應該係成個餐最好食。味道係正常奶黃千層糕味。

大佬呀，1888架個餐，你得個千層糕係得嘅。啲魚呀，雞呀全部都唔得，咁算點先。仲有呀上菜啲次序又亂咁黎，邊可能上「碧綠花姿象拔蚌」呢啲炒嘢呀，係都上乳豬拼盤先啦。啲姐姐，算啦，五六個人踩成場，都無謂對你咁高要求。

一句講哂，落大家樂鋸扒好過........