呢間鋪真係好有驚喜！本身見間鋪咁難搵有啲擔心，因為係要入後巷先搵到間lift上樓。點知一上到去就比個門口驚艷左，餐廳環境同啲擺設都好靚！侍應都有好禮貌，服務好細心，令呢餐飯整體又加左唔少分數。
之後要講野食方面啦，今日嗌咗碗烏冬、少少串燒、綿花糖壽喜燒鍋同埋同朋友一人一杯野飲，每人樣都係好好食完全冇失望嘅空間！
碗豚肉白湯烏冬湯底濃郁，啲烏冬勁掛湯，烏冬控必點！大蔥雞同大蔥豚肉卷串燒都係勁香蔥味，鐘意食大蔥嘅Foodie一定要trytry！呢間嘅和牛絕對係冇得輸，無論係串燒定壽喜燒鍋嘅和牛都完全喺我內心100分！啲牛勁滑，超香牛味，完全唔韌！只可以話果然係A5和牛，真係會令人上癮，淨係舊和牛已經令我想再次番黎再食過！
招牌嘅綿花糖壽喜燒鍋更加係令我同朋友都覺得十分驚喜！侍應會喺客人面前將個綿花糖慢慢融入鍋再加埋調料整成一個綿花糖壽喜燒鍋，亦都會為客人料理埋啲和牛，再夾埋入客人個碗度。 呢個服務同埋視覺享受都已經令我覺得值回票價，再加埋咁出色嘅味道，只可以話係無可挑剔。
野飲方面，我地嗌左一杯Cocktail（Neri）同一杯Mocktail。杯Mocktail就酸酸地又帶啲西瓜香，飯前飲真係好開胃。而Neri嘅登場已經係超fancy，侍應會喺你面前燒啲煙入玻璃樽再打開，岩哂各位foodie打卡用。試埋個味嗰下真係哇出黎，令唔太好酒嘅我都覺得真係好出色好易入口，啲 煙燻味完全係一大加分位！
Overall黎講，呢間十侍絕對會令我想不停翻兜！無論係眼球定味覺都十分之滿足，好推介大家去試下。
