得閒飲茶 (MONTEREY Place)

今日朋友仔帶咗我嚟呢間有開揚海景嘅店舖嘆點心。呢度地方相當闊落舒服，仲可以帶寵物嚟。侍應服務細心週到，老闆娘有時間嘅話仲會過嚟介紹每款美點，仲中途幫我哋加熱返個點心，呢種體貼真係加曬分呀！👍👍👍
粉葛章魚豬骨湯： 非常足料，絕無味精，每朝七點就開始製作，湯味濃，好有住家感覺！
蝦多士：咬落非常鬆脆，蝦肉彈牙，配埋個沙律食，口感層次豐富。
蘿蔔絲酥餅：外皮酥脆，蘿蔔絲餡軟滑青甜，高質。
焗叉燒包：每日攞新鮮叉燒即製，皮薄餡靚，叉燒口感鬆軟，嗰種甜味又唔會好“漏”，正。
懷舊臘腸卷：臘腸夠曬大條，配軟軟嘅包皮食，味香又夠juicy。
懷舊豬潤燒賣：大大舊嘅豬潤配足料嘅蝦肉香菇燒賣，真係好少地方有，味道交融得恰到好處。
陳皮普洱入口順滑，茶味香又解膩消滯，嘆住茶欣賞海景，舒心。😚😃