真秘鍋 (已結業)

朋友好耐冇见想聚下，一行八人订咗VIP房。经WhatsApp订位，餐厅人员回覆得都好快，仲send相俾我地拣房，服务态度唔错。餐厅有好多种唔同大细房间，最后我哋俾咗$1000订金，拣咗间$4000最低消费嘅圆枱房。房间有两个炉位，但系我哋主要想唱K饮酒，所以只开咗一个锅，拣咗玫瑰花胶鸡拼药膳鱼头汤底。靓女侍应姐姐介绍打边炉前一定要试吓饮碗招牌汤底先，用足真材实料熬制，果然好香浓，饮完亦都唔口渴，应该好似佢哋咁讲冇落味精。两款汤底每人都各饮足一碗。刺身我地点左原条象拔蚌，冰底上够冻好鲜甜，不过影唔切相一嚟到就俾大家食晒啦。肉类方面我地点左一个有齐牛、猪、羊嘅拼盘，摆盘好精致，肉类质量都高。朋友钟意食猪，另外带咗一个玫瑰松阪猪，整成玫瑰咁嘅形状，好食得来够靓可以打卡。饺子拼盘系餐厅手工自家制，其中竹笙饺几特别，清清地唔错。即炸响铃亦都炸得酥脆。之后朋友加点左唔少火锅配料，但系大家已经开始饮到兴起就冇影相啦。八点入座玩到凌晨两点大家食饱饮醉，尽兴而归，VIP房最低消费价钱唔算平，但以呢个食物质素，加埋可以唱K饮酒成晚唔使转场，除翻开人头朋友们都觉得系几抵。