孖寶車仔麵

营业中

休息中

今日黎葵芳睇戲，未開始前就當然黎葵廣搵食啦，葵廣出晒名多野食，小食店居多又唔想企係度食咁論盡，就黎呢間孖寶車仔麵食個車仔麵啦，網上睇到咁多好評，點都要試下啦，唔好睇少佢都幾多位喎，有幾間鋪位都係佢既。坐底睇下餐牌，餐牌封面好似本秘笈咁幾得意，枱上都有菜脯任食，不過就細粒d，除左車仔麵都有飯，仲有腸粉燒賣呢類小食，見好多人坐底都食腸粉，車仔麵除左自選餸仲有佢自己既配搭，不過跟埋野飲就無咁抵，自選3餸麵就50蚊送飲品，凍飲加3蚊。我揀左個自選3餸油麵配秘製汁，秘製汁其實就咖哩汁，少少辣有咖哩味，油麵就正常，餸就揀豬大腸，咖哩魷魚同魚春卷，豬大腸鹵過幾入味而且無異味幾好，咖哩魷魚好貼心咁分開上，不過凍既，我都係加落湯度浸熱佢，魚春卷比較少食試下，有2條，似係鯪魚肉，都係有少少凍，比較一般。跟餐叫杯凍檸茶少甜，茶味一般。另外再加份小食辣魚蛋，10蚊6粒，價錢唔算平，魚蛋幾彈牙辣汁都算幾辣，ok既。整體黎講我覺得還可，好好食就稱不上但叫做多款野食又可以坐底，店員既服務態度又幾唔錯，算有禮貌。