添仔蝦餃 (已結業)

聯和墟熟食中心，係我去過咁多個之中，枱凳擺得比較疏落，所以無咁大壓迫感。聽講話政府為咗減少行政成本，已經唔再起熟食中心了。喺呢個大地產商同領展霸權橫行嘅年代，我哋仲有幾多平民食堂可以揀呢？遲啲街外清一色中高價餐廳，屋企又太細唔方便煮嘢食，諗起都驚驚哋。添仔蝦餃嘅點心當然比連鎖酒樓經濟，一盅兩件$50落樓。蝦餃算有彈性同蝦味，以價錢計無得投訴。仲有一啲特色腸粉，如蘿蔔絲酥餅腸，係少見嘅選擇。蒸飯啱啲細食人士，雞肉偏淡，如果再多啲味道會更好。