金滿堂甜品

营业中

休息中

食完饭阿女话要食甜品，淘大商场附近都有好几间选择，睇咗餐牌，最后扑锤食呢间金满堂。间铺唔大，坐得几逼夹。餐牌上嘅选择妥多，睇咗一轮，阿女拣咗个芒芒小丸子，阿仔嗌咗个金玉满堂，而我就比较唔好彩，想要嘅甜品都卖晒，拣到第三次至拣到个「乐天」。啲甜品话都冇咁快就送咗上枱，大家嘅第一个反应都系话呢度嘅甜品好，因为真系唔系太甜。首先要讲嘅系碗芒芒小丸子，除咗芒果同雪糕，仲有小丸子同大量嘅水晶珠，阿女就系睇中啲珠仔至拣佢的，加埋芒果汁底，话非常之满足㖞！阿仔嘅金玉满堂其实系芒芒小丸子嘅升级版，比芒芒小丸子多咗龙眼同芦荟，基本上佢哋两个嗌嘅嘢其实都系差唔多。我要嘅「乐天」最后送上。呢个甜品系紫米露底，除咗有芒果之外，仲有啲清心丸同一个自选嘅雪糕（我拣咗奶茶味）。我一向钟意紫米做嘅甜品，呢度嘅紫米煮得好，够冧，加埋啲牛奶味道啱啱好，非常合我心水。好在我哋嚟得早，唔使等就可以入座，我哋走嘅时候出边已经有一条人龙在等位。睇嚟呢间甜品店嘅人气真系唔错，有机会会再嚟试佢其他嘅甜品。