正宗上海生煎皇后麵館 (已結業)

今日去咗Elaine麵館試食，一嚟到就醒咗碟炸饅頭我食（配朱古力醬），幾好味，最窩心都係杯檸檬水，因為當時都幾頸渴，一個字，爽！跟住招牌皇后麵出場，第一時間呷咗一啖湯底，非常之好飲，冇味精，抵讚！講番個麵，配料非常多，有花膠、秋葵、黑木耳、蓮藕，同埋最驚喜係橙皮豬軟骨，充滿橙香，識食最好加埋辣菜脯（任加），之後上埋五色餃子（絕對要早去食，我點完之後好似話賣哂），呢五隻餃子絕對要試，其中一隻係芝士餡，好得意！飲品方面，我點咗一杯黑糖珍珠低糖豆漿，杯嘢其實幾甜吓（有違低糖個名，下次叫小甜，哈哈）！本來都食飽，朋友問要唔要再order食物，我就再叫咗個口水雞，味道尚可，但肉質可以再冧啲，滑啲，但都可以接受！食完，Elaine返到舖頭，諗住同佢傾嘢，點知原來有記者等佢做訪問，我都等咗佢半個鐘有多，喺等佢期間，朋友又醒多碟糯米釀雞翼我食，嘩，不得了，今晚唔駛食晚飯，超飽！食完，終於等到Elaine有時間同我傾嘢，傾完之後，捧住個肚出去行街！多謝好朋友Rainbow今日嘅安排，另外多謝Elaine非常客氣咁招待，超nice，又影相又問夠唔夠食，今日超滿足！下次再嚟幫襯！