和一麵蔵專門 (已結業)

之前，經過德輔道中，見到和一麵蔵，下午茶幾抵食！ $33 已有交易！一向我知道呢間嘢食唔平！趁早放工，走嚟試吓！店員放低個 Menu ，好似用皮做，幾揼本！而且耐用啲！黑豚肉生薑燒大碗飯 $33我見呢個飯有薑為材料，落單之前，問清楚店員辣唔辣？知道唔辣先叫。大碗程度相等於"吉野家"大碗飯。 黑豚肉肉質嫩滑，唔韌，夠入味！份量出奇地多！起碼有 8 塊！ 成碗見唔到薑嘅蹤影，以薑汁同黑豚肉一齊煮，只有好香薑味，食不出其辣味！啱哂唔食辣嘅我！加埋洋蔥，洋蔥都好入味同夠腍！但係唔似吉野家咁腍！ 飯係珍珠米，略嫌薑味燒汁唔多夠，否則仲正呀！面豉湯 有少許蔥粒、豆腐粒；反而缺乏一點口感！因為無咩海帶，豆腐太細粒！尚算滑！但係，咸咗少少！自從去完日本飲過當地嘅面豉湯，幾時都覺得日本麵豉湯最好飲！返到香港之後，覺得好多日本餐廳嘅面豉湯偏咸！雜莓花茶好濃蜜糖味，甜甜地，花茶味不突出！只屬一般！我發現洗手間門外，以紅色及藍色日本木屐作辨認，十分有趣！