富華冰室 (葵涌廣場)

营业中

休息中

同朋友響葵芳區做嘢，落去買嘢嘅時候諗住直接食埋飯先返上去繼續做，行過新都會廣場覺得冇乜嘢特別想食，所以就走咗去隔離葵涌廣場搵食，因為係晚飯時間行過幾間餐廳都好多人，見到以前嗰間富華諗住過去睇吓點知條龍好長。所以就決定試吓佢同一個商場嘅第二間分店，地點一樣咁方便，葵芳地鐵站行出嚟就係葵涌廣場地面嗰層行入少少就見到，可能因為比較新，所以感覺比較乾淨企理，最重要係唔係好多人排隊，主要係買外賣為主。我叫咗個豉椒牛河，分量維持水平都好足夠，豉椒青椒味道都好出，牛肉方面普遍來講都幾好食，係其中一兩篇比較難咬，味道方面亦都唔錯，由落單到炒出黎都算快手，工作人員態度亦都唔錯，下次會試吓返嚟食第二啲嘢。