吉吉點 (已結業)

好耐之前已经想试吉吉点的点心，今日终于有机会经过附近，当然要同朋友去试下啦。吉吉点的坐位唔多，好彩都唔洗等好耐就可以入坐，坐位有D逼，但都算企理的。烧汁烟鸭胸肠粉 - 肠粉好滑，烧汁烟鸭胸配落感觉新鲜，但好似其他款式的肠粉更吸引。青芥末鲮鱼球 - 其实个鲮鱼球就系普普通通，但个酱系类似沙律酱加上青芥末的味道，配搭起来出奇地好味。古法马拉糕 - 其实系食左一半先记得影，分量系正常酒楼分量，而且够松软好味。千层珍珠鸡 - 一笼有两只珍珠鸡，虽然唔系好大只，但真材实料，食落啖啖肉，味道都唔错。千层姜汁糕 - 食完点心都未够喉，叫多左个千层姜汁糕，热食真系一流，够姜味但又唔会太辣，推荐之选。整体而言，点心水平比现时酒楼好，茶位又唔算贵($5 位)，仲要免加一，真系可以再来试埋其他点心。