呢間牛八近期新開，以飛機場候機室特色裝修全餐廳，餐廳門口位仲有航班信息加埋入場門票以機票形式展現，真係會有少少俾佢呃到。但由於新開，人都多，建議大家一係早啲黎排隊，一係就提早預訂
店內環境乾淨企理唔算太大，四人位置就比較舒服，如果係兩個人嘅位爐就非常細，可能心急嘅朋友就要慢慢等啲食物熟先可以燒下一輪
餐廳有三個Plan，一個係牛，一個牛再加海鮮，一個係牛加海鮮再加和牛，我地揀咗最貴嘅Plan 想試試啲和牛品質，承惠每人588+20（星期六日去要額外加20）再加一
熱盤區食物種類唔多，可以話非常少只有一兩樣炸野同幾樣菜，而飲品選擇就只有6-7種，冇紙包同罐裝飲品。同樣甜品亦都得3樣，但一口泡芙味道唔錯，但外皮一啲都唔脆。
而食物方面，值得一讚肉類質素唔錯，冇冷凍肉感，肉質細膩紋路正常，同牛角質素差唔多，燒落食落都食唔到任何臭肉，讚，比起平時一啲放題店放係出面任你拎嘅肉，質素高幾級。（食餐方式係以飛機模式嘅輸送帶，真係過足曬癮）
最好食係和牛牛舌同厚切1Cm豬腩肉，前者脆口之餘雪花嘅油膩感唔高，加埋燒汁食好正，後者我鐘意燒到兩邊脆皮，再加辣醬包生菜變成韓式食法😂😂。
澳洲和牛好食過黑毛和牛，因為雪花分佈均衡牛味食，食落軟滑香，但未到入口即化，而且每次黎嘅品質都好唔定，好睇師傅切到咩位比你。但細細塊一啖一塊差唔多。
但魚類，海解，貝真係唔推介，一黎品質一般，二黎燒出黎口感麻麻，同埋選擇都很非常少，少到每款得一樣，所以一黎揀食牛餐，一係就和牛餐。
亦食到最後每人可以揀一個雪糕，烘茶比較好食，香濃焙茶味但又唔太甜，算唔錯
係候機室環境食野，加埋登機廣播，真係會覺得自己置身於飛機場，而且抽風系統做得好加埋夠高，食完翻屋企都聞唔到太大味。疫情期間，大家都冇得離景或者搭飛機，黎呢間餐廳食飯對於大朋小友都不失為一個好去處。
值得一試，香港同類餐廳極少
（但由於新開張，繁忙時段人手不足，大家可能要叫多幾次或者比啲耐心等）
