春天 (已結業)

大概下午兩點經過留意到呢間以紅色為主，牆上貼上古典美式牆紙，掛住幾幅油畫同埋歐式吊燈，設計傾向古典歐式嘅餐廳。睇吓門口餐牌仲係午餐，價錢都幾幾抵，一行三人決定喺度食晏。我哋叫咗兩個午餐，兩個下午茶餐，除咗咖喱牛腩外，其他質素都唔錯。午餐可選擇餐湯或田園沙律，湯都可以，沙律太乾。香煎羊扒拼魚柳意粉，羊扒好嫩好味，魚柳稍乾。秘製咖喱牛筋腩飯，除咗牛筋軟淋外，牛腩真係唔掂，又鞋又韌。下午3:00下午茶餐嘅黑松露野菌意大利粉，好香蒜味，黑松露味都有啲，份量以下午茶嚟講都幾滿意，味道又幾好。吉列魚柳配薯條，午巿及下午茶無小食，所以叫多個餐，魚柳同午餐嘅魚唔同，多少少魚味，薯粉比快餐店粗啲，新鮮熱辣辣。凍飲無需加錢。熱奶茶用茶包，但無蓋焗住，所以色同茶味欠奉。