幸亭拉麵 (已結業)

想試呢間拉麵好耐，今日終於有機會一試。之前睇報紙見到呢度有唔同辣度嘅勁辣拉麵，好似好正咁，其實我就係為咗佢而嚟XP呢度嘅地獄拉麵有4個辣度，肉方面有豚角煮或叉燒，同有齊兩款肉嘅御品拉麵。其他配料包括糖心蛋、木耳等。既然價錢唔差太遠，我就揀咗御品拉麵。辣度方面揀咗3級。我大約7點到達，由於尚未有其他客，大概5分鐘已有得食。御品地獄拉麵 - 3級辣配料同麵嘅份量都幾足，豚角煮同叉燒各有兩件，另有木耳同半隻糖心蛋。肉質夠淋同尚算入味。但可能依家啲拉麵店已做得好出色，所以配料整體嚟講其實唔算好突出。至於湯方面，顏色比我想像中淡，辣度亦唔夠，所以嗜辣嘅我最後都係加咗好多一味粉同辣油；值得一讚嘅係呢度嘅辣油都幾香架喎。湯底方面雖然唔算好濃，但食時反而覺得冇咁滯，相信較適合香港人嘅胃口。麵方面就有啲驚喜。粗幼適中，硬度適中、而且亦十分彈牙，比出面嘅拉麵店較有口感。價錢方面亦十分大眾方，$60-70已有一碗。唯獨係店舖太細，只有8個座位，只適合食完就走。