琥酌

今日落區做野，俾我响太子舊區發現到呢間卓爾不群、門面光鮮亮麗既餐廳，就俾佢出眾既外表吸引左入去。餐廳內既裝潢舒適簡約，乾淨整潔。而且設有吧枱座位，好有日式居酒屋既感覺。我覺得有吧枱位最大既好處係一個人食野都唔會覺得尷尬。服務方面真係冇得彈，d服務員真係非常主動又好笑容，教我點燒牛肉，又頻頻加茶，食完又拿拿淋清潔枱面，等我同同事坐得舒服d，真係好體貼。

琥酌主打食吉列牛，有三個套餐可以選擇。

飲品方面有特色口味既手工啤酒，有平時比較少見既口味。其實好想試，不過食完飯仲要做野就冇試勒。

食物方面叫左個美國安格斯牛吉列套餐，賣相都唔錯。有個搓成一個波既龍蝦薯仔沙律，本菇漬物，麵豉湯，温泉蛋，同木魚片配白飯。

隻温泉蛋可以點燒過既牛肉食，或者用黎撈飯都得。我就鐘意撈飯食，撈完d飯又滑又有蛋香。

問過服務員其實d牛肉係可以生食既，不過燒一燒就會香好多，所以都建議我哋燒過先食。自己燒既好處係你鐘意燒幾生幾熟都得，想食嫩d嘅就燒短d時間，鐘意有𡁻口既就可以燒熟d。d牛肉冇乜脂肪，食落都唔覺得肥膩，肉香都唔錯。

燒好既牛肉可以醮芝麻汁、芥末沙律醬、柚子醋、岩鹽、芥末或者柚子芥末食。各有特色，我就最鐘意柚子醋，酸酸地，開胃解油。