二鍋頭 (福苑)

营业中

休息中

呢間火鍋放題又有新搞作，除咗黑椒豬手煲同火焰牛尾煲外，雞煲新增重慶麻辣、辣酒東風螺、泰式冬陰功、雙乳（咸牛乳+腐乳）、連醬香惹味雞煲一共六款口味。烤魚亦有六種口味另有酸菜魚，同我地今餐主要目標秘製牛雜煲無限時無限量任飲飲食。秘製牛雜煲有牛毛肚、金錢肚、牛蒡、牛腸、牛肺、牛腩都好入味，醬汁微辣香濃，加入大蔥、洋蔥等相當香，連蘿蔔都好清甜。火焰牛尾煲，店員會即炒加入玫瑰露點火，酒香即時散發，牛尾肉質軟硬適中帶點彈性，同樣係香口煲仔菜。醬香惹味雞煲，的確好惹味，味道相當好雞肉保持嫩滑，啱晒唔食辣嘅朋友。免費鴛鴦湯底揀蕃茄薯仔濃湯及胡椒豬肚雞鍋，除咗煲仔菜好食，湯底都好出色好濃郁，重點係唔會咸，打邊爐最怕越食越咸，呢到嘅湯底恰到好處。火鍋配料亦好豐富，除牛板腱，本地鮮滑牛，仲有海蝦、帆立貝、吊桶仔、墨魚仔、蜆、水土魷、墨魚滑、牛栢葉、豬頸肉、豬大腸等等等等，多到數唔晒，火鍋料質素都係唔錯，仲有自助區多款火鍋配料可供選擇。飲品有汽水、罐裝茶、樽裝涼茶，仲有雪糕雪條都係任食，重點係無限時，可以一邊食一邊慢慢傾談都無問題。