素年 (福隆大廈)

之前喺第二間cafe試過impossible meat，當時真係好驚訝味道同口感都做得非常似牛肉。今次就喺素年encore呢隻素肉嘅漢堡扒版本，咬落去口感其實同真肉好接近只係無咁結實，而且仲整到五成熟咁中間半紅而且非常多汁，加埋火箭菜同芝士唔講真係以為食緊真牛肉漢堡。不過原來呢種素肉雖然保留到真肉嘅營養但卡路里同時係比真肉高！

不可能漢堡包

至於新豬肉我就第一次試，同素牛肉一樣個口感會比較鬆散，無真豬肉咁結實，而且係完全無肥肉油脂個種感覺。換嚟嘅好處就係營養成份比真豬肉更好，減低一半以上嘅飽和脂肪同卡路里仲無膽固醇，非常適合追求健康嘅朋友。除咗個豬，日式咖哩同意大利飯好夾，當中仲有一啲雞髀菇，真係份量超大！

日式咖哩吉列豬扒意大利飯

至於蕃薯條個黑松露蛋黃醬係非常出色，蕃薯條唔算太甜所以都比想像中夾。

黑松露蛋黃醬蕃薯條

黑松露蛋黃醬蕃薯條

我自問係個食肉獸，要我完全唔食肉基本上係唔可能，但考慮到人類引致嘅氣候同糧食問題，若然呢種新嘅生物科技可減碳排放同解決糧食問題，我覺得慢慢轉食素肉亦會係重要嘅一大步！