伍佰海鮮火鍋 (已結業)

之前食過唔少嘅盆菜都係朋友推介,今年係社交平台揾下，見到呢間火鍋店新開而且仲推出盆菜,膽粗粗試一下。買咗返嚟打開錫紙見到好飽滿,最吸睛就係啲鮑魚都唔細,加咗啲汁落去慢火等滾起。我當然第一就試咗個鮑魚先,彈牙真係唔錯跟住試咗佢嘅燒鴨,好正,仲有荔枝柴嘅香味。金蠔簡直係我favor,好香蠔味,最重要夠肥！雞正正常常,冬菇好厚身,發菜同瑤柱都好,起碼瑤柱唔會一夾就散。隻蝦好正,有豉油黃香味,啲蝦頭啲膏仲係好出。鯪魚球還可以,芋頭唔錯仲有粉,蘿蔔夠入味。整體嚟講$1088,已經無可挑剔,比我預期水準好好多。聽聞佢啲小菜同火鍋都唔錯,遲啲去可以試下。