吃吧 (僑建大廈) (已結業)

去到即使book咗枱都等好耐先有位，坐低冇水。見到餐牌大大個WeChat QR code 然後話自己係黃店係咩玩法⋯⋯我地叫咗三樣嘢食，等咗大半個鐘都未到，眼見隔離同我地一齊入嘅人啲嘢差不多到齊啦⋯⋯終於見到個拼盤喺廚房出嚟。點知去咗隔離枱，仲要同隔離枱食緊嘢嘅客距離好近，confirm咗唔係佢地嘅就送翻入廚房，好似全世界都唔知發生咩事咁樣。然後幫我哋落單嗰個姐姐就行過嚟問我其實我哋落咗啲乜嘢，係嗰一刻我哋先至知道原來佢將我哋嘅所有餸都落咗隔離枱。然後餐廳就將嗰碟遞咗過去隔離枱嘅餸帶返俾我哋，基於衛生考慮，我就好唔好意思咁同餐廳講：因為呢一碟餸已經去過隔離枱，我覺得有啲唔衛生。餐廳職員就好冇禮貌咁樣同我講：得，咁我叫廚房做過囉。 之後等咗差唔多半個鐘啲嘢先至再到齊返。到最後餐廳都冇同我哋講過一句唔好意思。拼盤材料唔算特別新鮮，法式焗雞又乾又硬又柴，完全同之前睇過嘅食評大相逕庭⋯⋯總括而言，對呢間餐廳真係好失望，除咗舖頭有少少文宣之外，完全睇唔出佢哋係一間良心小店。其實黃店只係一個口號，但係好唔好食真係要憑良心講。