扒王之王 (已結業)

我係第一次發表食評，但估唔到就咁奉獻咗比扒王之王。一向會去娛樂城呢間分店，因為價錢唔貴，幾十蚊可食扒食到飽，但最近去過，發覺已抽起所有平價套餐，變咗最平都要$98，我見套餐內有頭盤、餐湯、主菜、甜品和餐茶，都算合理咪叫囉！點知係咁難食，肉眼扒完全無牛味，用勁辣的黑椒汁來加味，頭盤田螺好少，甜品是雪糕球加罐頭雜果，龍蝦湯好稀唔夠味。以為我朋友個$118套餐會好食ｄ，但都一樣咁衰，仲要等咗好耐至上主菜，佢個甜品更係我從未食過咁難食的芝士蛋糕，好似用濕咗麵粉搓埋一舊，我唔會再去幫襯！