甜姨姨 (耀華街)

营业中

休息中

再次到訪 甜姨姨 銅鑼灣分店限定既日式刨冰，融入港式口味，有奶醬多 楊枝甘露 黑芝麻豆腐 多款獨特口味。而且每個月都會有期間限定既刨冰！二月份 甜姨姨就同日本和粉彩插畫師Thomas x Bliss Moments合作，製作岀『小王子JADEN』芋蓉椰子味刨冰 。芋蓉椰子味刨冰 $138刨冰頂層既小皇冠、小王子插畫以及閃令令既星星，不禁令人聯想起星空。外層既粉藍色，用上碟豆花作天然色素，入口濃郁椰香。一刮開，就會見到紫色既刨冰同椰子碎。椰子碎香脆，令口感同味道更為豐富。作為芋頭控嘅我，就覺得中間紫色既刨冰，芋頭味唔太突岀。不過店家早有準備，當覺得唔夠味嘅時候，就可以倒入旁邊既芋頭醬，味道有啲似細個食開嘅香芋糯米糍。食到最底有驚喜。刨冰化身為一碗芋蓉椰汁西米露。芋頭蓉綿密之餘，又會食到芋頭顆粒，配埋西米，口感豐富。不過可能係同冰放擺一齊既關係，西米有小小偏硬。芋頭控表示，如果芋頭蓉可以多啲多啲再多啲，由頭食到尾都有就好喇。值得一讚既係，食晒成碗冰都唔會太甜膩。