東海海鮮酒家 (已結業)

又到食大閘蟹時間，星期一約埋老友去嘆下﹗講左幾個月，格左好幾次價，最後揀左......尖東既東海，七點去到現場所見所有人都係食蟹餐﹗我地點左個$260既蟹餐，包兩隻蟹，都幾多野食﹗東海連個碟都整埋係大閘蟹，好鬼靚呢﹗先上的是魚翅佛跳牆﹗湯頭清甜潤，內有大瑤柱、花膠、魚翅群、花菇等﹗用料夠多又夠入味﹗同友人大讚呢個佛跳牆做得很不錯﹗絕對不是什麼生粉水蟹皇翅之流﹗跟住係一人兩隻蟹粉小籠包﹗小籠包都幾大隻，多汁，蟹粉亦多入口濃甜味美，唔錯﹗主角到喇﹗大閘蟹公﹗開蓋未算爆油爆膏﹗蟹肺夠白亦清，睇住佢地有人0係出面即叫即蒸，新鮮﹗蟹膏金黃，入口又甘又香﹔大量蟹精雪白呈半透明狀，黐得口腔滿佈濃香。那種香氣在口內繚繞的感覺真不是文字能形容，愛吃蟹公的朋友必明其中道理‧精華不在殼，聚在蟹爪上﹗套餐無酒水包，我地兩個叫左瓶細花鵰仔$60助一助興，易入口帶梅子香，配蟹食一流﹗黎祥哥做佢地代言人﹗第二隻蟹0的精仲多過第一隻，只管食及感受，不拍照了﹗套餐包油菜一碟﹗仲有蟹粉蒜蓉包蟹粉唔係好多，不過配蒜蓉包可以達到香上加香的效果﹗仲包多個咩手打烏冬，呢個好流，味道仲差過油渣麵﹗甜品當然係蕃薯薑糖水，飲完成身暖哂