LE BREAD LAB (已結業)

今日約咗幾個朋友去佐敦食飯，但有一個朋友未收工要加班，所以我同另一個朋友近近地就去左尖沙咀美麗華行街。行行吓有啲肚餓就走左上去搵小食充飢。之前有一間韓國甜品店開咗好耐都嘗試，一直冇機會今日機會嚟啦！間鋪頭喺美麗華最頂果層，唔難搵，扶手電梯一上就見到。全間鋪頭粉紅色，好少女味，啱哂鍾意打卡嘅女仔連同朋友食個hightea，又或者靜靜地坐喺度等人hea下都得。我同朋友本來想試士多啤梨乳酪帶已經賣晒，最後叫咗一個士多啤梨奶茶share一齊飲。杯嘢飲係即叫即整，職員整好會入樽，個樽好靚，好似一個玻璃個奶樽咁。個奶茶顏色係比平時既奶茶更淡既淺啡色，飲落好香紅茶味，但士多啤梨就唔係好出，奶茶味道偏甜。如果叫士多啤梨牛奶，仲會有啲新鮮士多啤梨粒粒添。鋪頭除咗有士多啤梨飲品賣之外，仲有好多細細件嘅蛋糕仔，下午茶你食幾件蛋糕仔加杯嘢飲就啱晒啦。