船仔 (京瑞廣場) (已結業)

呢間船麵近排好多人推介，一搵沙田美食差不多俾佢洗版，攪到今晚我地麵要嚟湊熱鬧。入到去店面好得意，有好多店員手寫嘅攪鬼提示，嚟之前朋友已經話入面嘅嘢飲好特別，好值得試，見到牆上貼咗特飲介紹，決定試豆漿蘭香籽。點菜！當然食最出名嘅船麵，配菜有好多選擇，我揀咗豬頸肉加扎肉，朋友揀雞翼同扎肉。反轉張點菜紙，後面話加錢可加串燒，當然要加啦。麵嚟喇！一望個湯式咁深色已經同出面唔同，同埋超級香。食落個湯真係好正，比出面的越南粉湯式更湯更惹味。而佢配菜之一嘅炸豬皮粒，唔好講笑好辣，我唔食得辣，所以個湯底浸得耐都變咗有辣，下次我會走炸豬皮粒。豬頸肉同雞翼都好好食，而扎肉同出面啲麵粉較多嘅扎肉唔同，呢一個較為軟身，我覺得好好味。串燒非常推介，尤其係個沙嗲醬，一流！唯一美中不足係個嘢飲，個豆漿有少少鹹，所謂嘅香籽其實就好似西米，所以豆漿加入面啲西米其實唔係好match。