小火焰韓式咖啡廳 (觀點中心) (已結業)

星期六同男朋友黎到觀塘食韓國野，午餐幾抵食又多選擇，亦唔需要加一。我地最後揀左大醬黑豚粉絲鍋同明洞餃子炒粉絲，跟餐加$10要甜辣韓式炸雞同卡邦尼小杯年糕，飲蜂蜜紅棗茶同蜂蜜生薑茶，再要個雪花冰。明洞餃子炒粉絲好夠熱，食到尾都係熱架。有三隻煎餃子，幾香口。炒粉絲略油，但有好多蔬菜配料一齊食可以中和返。大醬黑豚粉絲鍋除咗有粉絲，仲有一碗飯。大醬湯辣辣地，冬天飲好適合。黑豚肉亦夠軟腍。甜辣韓式炸雞$10就有三舊，好抵食。卡邦尼小杯年糕煙煙韌韌，卡邦尼汁撈飯食都好夾。糯米糍3.6牛乳雪花冰磨到勁幼滑，入口即化，糯米糍好煙韌，我好鍾意，仲有球朱古力雪糕添。最後飲蜂蜜紅棗茶同蜂蜜生薑茶暖暖身。