漁牧 (已結業)

今日同朋友行完Megabox睇下有咩好嘢食，朋友话想打下边炉，见到一间门面红当当嘅京川粤菜餐厅原来系打边炉㗎，咁就啱晒啦！仲有鸡煲添！餐厅装修都几雅致，深红色嘅装修完全体现出中国京川粤嘅特色。汤底方面我哋拣咗个滋补花胶鸡锅，有多种唔同嘅药材同大大件花胶，滋补又养颜。啲鸡仲系用新鲜鸡，非常嫩滑，而且份量好足，半只都已经好够食！职员仲会好细心比个漏斗，等啲沙漏完就可以食啲鸡，如果唔系就会太过「鞋」口。原只鲜鱿筒真系原只上架，好大只，超新鲜，啖啖鲜味。手打墨鱼滑爽口又弹牙。因为朋友都唔系太好肉类，所以拣咗啲蔬菜，叫咗碟白菜仔，未食已经知道好新鲜，啲叶又绿又嫩，唔系夸张，食落仲有菜嘅甜味添，证明真系百份百新鲜。我哋仲点咗两个小食，镇江小排骨同青瓜拌海哲，镇江小排骨酸酸甜甜，青瓜海哲爽口，味道清新，两个小食都令人好开胃。打边炉咁热气梗系要饮番个椰青啦，清热解渴，清甜又多汁，仲有一层层椰肉，好易刮出嚟，好甜呀！打完边炉未够喉嘅话，职员介绍仲有双色水晶球做甜品，红豆沙同奶黄馅嘅糕点，可以点少少糖霜食，再加粒士多啤梨，味道甜甜的，不错不错。