午市餐牌價錢已經包左餐湯、主菜同埋飲品，仲可以以優惠價錢加配小食添! 呢個價錢喺銅鑼灣來講可以話係好抵，食物份量非常之大，食完可以捧住嗰肚走🤣
菠菜蟹肉松露野菌燉飯 $88
一上枱已經俾佢嘅份量嚇咗一嚇，超大pat黑松露完全唔孤寒😍Risotto嘅質地偏軟淋身，非常索汁同埋基本上每一啖都食到菇/蟹肉！但係就完全食唔出有菠菜🤣 整體嚟講可以話係平靚正，食完一半都開始飽飽地!
賭你運氣...命運披薩 $98
話明係Little Vegas咁就緊係要賭下運氣！呢個pizza係廚師發板，夠哂神秘感😶今次我地呢個pizza餡料就有野菌、洋蔥同埋腸仔片! 批底比較薄脆再加上千島醬非常之惹味！雖然pizza非常多芝士，但係食落竟然完全唔膩，啱晒我呢啲唔鍾意食厚批嘅人👍🏻
炸魷魚圈 $28 ； 柚子雞翼 $42
炸魷魚圈一客有四舊，每一舊嘅炸皮都非常之薄唔會話食落一口粉👍🏻唯一一點就係略嫌食落魷魚圈唔夠爽，不過呢個價錢來講過下口癮都幾ok嘅🤣 另外朋友鍾意食雞翼就叫多咗一份柚子雞翼。雞翼方面就唔係炸嘅，似係煎焗完再喺面頭淋上柚子醬！雞翼每一隻都大大隻在沾滿甜甜酸酸嘅柚子醬，食落非常之開胃🤩
