天悅海鮮酒家 (已結業)

呢個位置真係有危有機，絕對可以用「三煞位」形容，做過泰式炒蟹、燉奶佬，又做過「置樂城」茶樓，無一間做得長。而天悅就係當中嘅奇葩，因為佢三年又三年，真係十年都嚟緊頭了。可能佢嘅成功就係在於打通門口！如果以前呢間鋪嘅東主，一直都無搞個門口，於是就只有2個位置可以入到去，就係近惠康嗰邊嘅入口同埋近7仔位置入口。依家放棄自己少少空間，令惠康嗰邊同埋置樂中間有個捷徑仔畀人行上行落，方便街坊之餘人流多咗，風水應該都好咗，因為真係川流不息。拉丁好遠，都係講返食。始終都係街坊茶樓，好多優惠畀公公婆婆。晏市普普通通，食飽絕對無問題；而晚市又以打邊爐出名，因為係好抵食嘅任食打邊爐，我哋一家人去一定平過100蚊，事關長者半價。唔好期待佢個湯底有幾靚，亦唔好期望食材有幾高級，嚟呢到都係志在一家人開開心心食個飯，係食呢到嘅人情味。個個侍應都識我家老人家，個個都過嚟寒暄，唔係街坊食堂日日幫襯，點會有呢種味道。